政情：盧偉國衰心急 貪快劃線遭圍攻 反拖慢審議
立法會工務小組委員會主席盧偉國（WK）主持會議手法屢受質疑，開會期間同議員「駁火」已經屢見不鮮，尋日工務小組召開四小時會議，討論有關中部水域興建人工島嘅研究項目，期間就火花四濺。WK疑心急想加快審議進度，喺開會唔夠一小時就提出「劃線」限制議員發言，點知就惹來不滿，因快得慢嘅佢仲被嘲「唔衰攞嚟衰」添。
政府計劃研究於香港島同大嶼山之間嘅中部水域興建人工島，呢個研究項目涉款逾五億五千萬元。工務小組尋日就繼續討論呢個項目，不過會議只係開始咗四十分鐘，WK就話有關項目喺上兩次會議已經討論咗三個半小時，大部分議員都只得番一分鐘發言時間，所以就宣布要劃線。
額外花時間討論中止待續
點知WK呢一着就換來民主派議員不滿喇，唔止不斷提出規程問題質疑WK，議員許智峯仲走到主席台前抗議，而議員鄺俊宇更表明既然WK劃線，佢就提出中止待續。結果會議又要再花時間討論中止待續。雖然中止待續動議被否決，但前後就花咗超過兩小時先至通過中部水域興建人工島呢項研究嘅撥款，而呢項撥款稍後就會交上財務委員會處理。
尹兆堅揶揄WK 唔衰攞嚟衰
對於WK原本打算快刀斬亂麻，點知就因快得慢，議員郭家麒就揶揄佢枉作小人，議員尹兆堅亦都話WK係唔衰攞嚟衰，全因WK劃線，先至引起爭議，搞到會議要花額外時間討論中止待續。之後會議再討論爭議較少嘅啟德機場北面停機坪基礎設施工程，但WK依然畀議員寸爆。話說議員胡志偉向發展局常任秘書長林世雄提問，質疑點解行人隧道同天橋唔可以畀單車踩入去。不過WK就話提問涉及更闊嘅政策，應該喺相關事務委員會討論。胡聽完就話︰「關你咩事啫盧偉國？」又話自己係問林，毋須WK搭嘴。議員區諾軒就形容WK周圍「斬人」，仲話要介紹WK去玩一隻以三國時代為背景嘅格鬥遊戲喎。
可能見WK不斷被圍攻，與其同屬建制派嘅建築、測量、都市規劃及園境界議員謝偉銓就提出規程問題，問議員提問係咪要經過主席安排官員作答，擺明畀位WK講清楚其做法合乎規程，總算令WK唔使孤軍作戰。而最後涉款十七億二千萬元嘅啟德機場北面停機坪基礎設施工程亦獲通過。