政情：唔想幼童變宅男宅女 廖秀卿設計互動遊戲
雖然話「勤有功，戲無益」，但對於小朋友嚟講，遊戲其實係一種天然嘅教育。香港大學教育學院融合與特殊教育研究發展中心計劃總監廖秀卿博士話，唔想小朋友日後成為不擅交際不通人情嘅宅男宅女，就要令佢哋喺遊戲當中領略到顧及別人同互相協作嘅重要性。
培養主動學習及社交能力
廖秀卿話家長為咗追求學業成績，好容易形成小朋友缺乏玩伴、欠缺玩遊戲嘅機會，同埋唔識得點玩遊戲嘅「三無」狀態，而家長又往往以為仔女只係「文靜內向」，從而對其社交能力係咪出現障礙掉以輕心。
有感新生代嘅社交能力偏低，佢喺舊年開始推行為期三年嘅「玩學相長」計劃，期望幼齡孩童透過互動嘅遊戲，培養主動學習同人際交往嘅能力。至於邊種遊戲適合小朋友寓玩於學，佢話只要過程中可以同他人互動，例如「煮飯仔」或「123紅綠燈」都得，而佢亦設計一系列互動遊戲，樂意同家長教師分享咁話。