政情：張華峰 叫錯朱克伯「洛」 熱門講成熟門
唔少議員都有玩開Facebook，同朋友交流之餘，又會用於展示議員工作，所以對Facebook一啲都唔陌生，不過就算唔玩開，都應該對Facebook始創人兼行政總裁朱克伯格有所認識，但喺尋日嘅立法會大會上，金融服務界議員張華峰（肥老闆）就錯稱做朱克伯「洛」，認真離奇。
以往曾「推動大亞灣」
肥老闆向來講嘢都有口音，以往開會發言時亦曾有講錯嘅時刻，好似試過無端端喺唔相關嘅議題中講推動大亞灣，令到全場滴汗。喺尋日討論私隱問題，肥老闆望實講稿發言，講到朱克伯格提過免費服務要靠廣告去經營，個人資料就係令服務達最大效率嘅關鍵，點知佢就錯講為朱克伯「洛」，似乎佢係睇錯講稿，將木字部錯睇成三點水囉！
發言短短六分半鐘，肥老闆就唔止講錯一次，好似講利用智能電話安裝熱門應用程式，就將熱門講成「熟門」，話呢類電子錢包、會員制嘅程式會收集用家嘅個人資料喎。