政情：屋邨冇留安老用地 羅致光捱鬧駁嘴
立法會議員梁耀忠尋日喺立法會上指，政府話一直有預留適當處所畀安老服務同措施，但元朗多條屋邨都冇預留地方作福利用途，又批評社會福利署過往曾有地唔用，指○八年港鐵擬喺天水圍西鐵站旁一幅土地興建私人樓宇，並向城規會申請刪除安老院舍，當時社署並冇反對，斥政府「講一套，做一套」。
話冇必要花時間爭辯
勞工及福利局局長羅致光就反駁，指議員好容易就可以舉出好多冇安老服務嘅屋邨，但佢亦能舉出好多有相應服務嘅屋邨，認為冇必要花時間爭辯邊一條屋邨有、邊一條屋邨冇。佢仲話喺一九年嘅財政預算中將會增撥資源，增加二千個名額畀改善家居同社區照顧服務。
勞工界議員陸頌雄批評，綜合家居照顧服務、改善家居同社區照顧服務、長者日間護理中心係目前主要嘅安老服務，但係有指政府近日有意更改長者健康同家居護理評估工具，令長者無法同時申請安老院舍同照顧服務，質問政府幾時先做到「零輪候」。
羅致光就呼籲議員「少聽謠言、多聽澄清」，重申機制並冇改變，但目前安老服務嘅樽頸唔係地方而係人手，已不斷增加名額，透過增加資源以提升各機構嘅服務量。