政情：議員質疑人工島研究重複 撥款打尖趕填海
立法會工務小組委員會尋日繼續審議喺香港島同大嶼山之間嘅中部水域，分階段進行填海興建人工島研究，涉款五億五千萬元，多名議員質疑研究有重複之嫌，又批評政府趕住填海，而喺兩小時會議結束時，議案仍未通過。
政府喺兩年前就連接堅尼地城與東大嶼都會，進行初步交通及運輸影響評估報告，但指報告陳舊、過時同唔完整，所以唔再適用。議員范國威話報告只完成兩年左右，但政府已認為報告內容過時，質疑如沿用同一原則，政府現時所申請嘅可行性研究係咪亦會同樣好快過時同唔適用。佢又批評政府將研究撥款「打尖」提交工務小組審議，明顯係想盡快填海，而棕地研究等其他可行方案則「歎慢板」。
議員鄭松泰亦指當時政府所做嘅研究報告已有確實鐵路研究方向，質疑再重複做研究會唔會有重疊，反問點解唔能夠剔出部分內容做研究。議員許智峯則指政府冇喺中西區區議會上公開相關報告，質疑當局係咪有意隱瞞區議會。
發展局否認隱瞞區會
發展局副局長廖振新否認隱瞞區議會，指有關報告係公開的，公眾同地區人士可參閱，而土木工程拓展署署長劉俊傑就解釋，根據明日大嶼嘅交通運輸網絡，最主要係增加多一條鐵路，由屯門至大嶼山，再經人工島通往港島，並強調雖然情況有唔同，但相關評估報告仍具有參考性。