政情：修逃犯例 肥彭指指點點被轟危言聳聽

無國際地位仍說三道四搗亂

肥彭喺英國接受訪問時指，今次修例有如移除香港及內地嘅「防火牆」，香港市民要承受面對內地司法制度嘅風險，對於有關修例導致外界發出警號，不感到意外，因為修例會破壞中國對一國兩制嘅承諾，亦有機會危害香港作為國際貿易中心。佢又認為，自國家主席習近平上台後，收緊對內地及香港嘅管治，香港嘅自由及法治情況日益變差。

對於肥彭突然現身評論移交逃犯修例，王國興話肥彭呢個過氣港督，依家根本喺國際政治冇地位，突然評論香港嘅修例，喺度說三道四，干預中國內政，違反國際慣例，無非係為咗搗亂。王又話就算修例後，香港仍然係普通法，唔係行大陸法，點會違反一國兩制，肥彭係明知情況但又誤導公眾，意圖支持反對派，造勢推翻條例。

移交逃犯漏洞 問題始作俑者

王國興又認為，肥彭提到若內地視香港係內地城市時，國際社會將認為香港唔再係特區，係想引伸以香港獨立關稅區地位或會受影響，以此作籌碼威脅香港政府，想令香港屈服，但呢種說法荒唐，有關修例天經地義，否則香港隨時成為逃犯天堂。

香港理工大學專業及持續教育學院講師陳偉強話，殖民地政府一直無處理本港同內地移交逃犯嘅問題，肥彭就係始作俑者，他已離開亞洲一段長時間，依家都唔熟悉亞洲事務，就唔應該危言聳聽，提出片面、偏激嘅言論，隨時誤導市民，令情況更混亂。

講真嗰句，「不在其位，不謀其政」，香港回歸已近廿二年，肥彭仲指指點點，擺明係刷存在感，搞事又搗亂，冇人會信佢。