中環出更：邵家臻服刑申出外開會再被拒

因佔中案被判入獄八個月嘅立法會社會福利界議員邵家臻，正喺在赤柱監獄服刑，但其議辦仍然繼續運作。佢早前第二次申請外出到立法會開會，想喺本周三出席立法會大會提口頭質詢，佢嘅社交網站貼文話懲教署尋日正式拒絕申請。

貼文話邵家臻希望喺立法會大會會議中提出有關「過勞死」嘅口頭質詢，亦希望親自向局方官員追問，因而向懲教署申請出席會議，但尋日遭懲教署拒絕。貼文指署方拒絕嘅原因同上次一樣，認為立法會權力同功能並唔會因邵家臻入獄而受影響，署方無法律責任協助邵家臻履行立法會職責。

對於署方拒絕邵家臻申請嘅理據，其議辦稱有保留，話正同律師商討就署方決定提司法覆核嘅可行性，律師稍後會約見邵家臻，聽取佢進一步嘅意願同指示。

邵家臻係「專業議政」嘅成員，該組織其餘四名議員尋日去信懲教署，指社福界日前發起聯署，支持懲教署批評邵家臻在囚期間如期出席立法會大會同福利事務委員會會議，而專業議政希望懲教署署長重新考慮邵家臻出外到立法會開會嘅申請，讓佢在囚期間繼續代表社福界履行立法會職務。

卓妮