中環出更：潮玩變面App 黃傑龍返老「頑童」
呢排政商界名人都潮玩Snapchat，將自己嗰樣返老還童，無論係自己或朋友睇到個童顏都覺得好有趣，好似稻苗學會會長黃傑龍（Simon）咁，日前喺Facebook上載咗佢嘅童顏，有網友即刻話有頑童Feel。
Simon喺Fb貼文「以前話有圖有真相，呢個時代有圖有片都……」睇嚟佢都唔多相信呢個係佢真正嘅童顏，有網友仲問佢App效果點？係咪真係可以返去童年時？另有網友就直情話「返老還童？光陰不再！」
就連問責官員都玩埋一份。勞工及福利局副局長徐英偉都有玩，仲畀網友讚佢「童年的你好靚仔！」另有網友仲話佢Cool添！
植潔鈴童顏被誤當女兒
有人齋放相，有區議員仲拍埋片。邊個？佢就係東區區議員植潔鈴（Elaine），短片出咗街後，大批網友讚佢好可愛、好得意同好靚女，有網民直情問佢「同邊個生左（咗）個女？」另有網民就以為短片中嘅小女孩係Elaine個女添！不過，有網友心水清，話佢把聲唔似六歲嘅小女孩。
拍片嘅仲有前港姐、淡出政圈之後仲做咗上市公司主席嘅袁彌明（Erica）。Erica話影到佢個頭好大，但係覺得個Look好得意。好多網友都讚佢本身就係靚女，又覺得佢嘅童顏十足佢中學時嘅樣，有網友就留言話係「大頭怪嬰」添！就連佢阿哥、新民黨前政策總裁袁彌昌（Derek）都有留言，話「假設童顏就是大眼肥臉實在太簡單」。究竟Derek係覺得個App唔掂吖？抑或寸緊個妹呢？
卓妮