政情：坐主席位唔走象哥驚人玩嘢？
立法會各個委員會選主席嘅程序好簡單，一般只係需要幾分鐘就搞掂，但自從早前有關修訂《逃犯條例》嘅法案委員會，先後經歷四次會議都選唔出主席，各議員似乎都提高警覺，好似同中區軍用碼頭相關嘅附屬法例小組委員會尋日開會，黃定光（象哥）負責主持會議，點知到佢接受提名選主席後，理應換人主持，象哥就無離開主席位，要其他議員提佢先識得走，唔通象哥擔心其他人主持會玩嘢，唔敢輕舉妄動？
按規矩，如果主持緊會議嘅議員接受咗提名去選主席，佢就唔可以繼續主持會議，要交畀其他議員，不過今朝經過議員動議象哥做主席後，象哥都話接受提名，隨即就問仲有冇其他動議，結果其他議員即刻提醒佢，話要換人主持，結果係由象哥黨友陳克勤頂上，而陳上到主席位後，即刻就叫象哥唔好行咁遠，似乎陳都預見到程序好快就結束，象哥好快又要返上嚟。
自動當選 過程三分鐘搞掂
結果象哥自動當選，亦冇人認為需要增設副主席，成個過程約三、四分鐘完成，有啲建制派議員更高呼「好有效率」添！