中環出更：許華傑享用高科技 秘書轉型做多面手
隨着科技進步，電腦已經可以執行大部分秘書嘅工作，咁波士做埋秘書份工，係咪可以取消秘書呢？中小型企業委員會主席許華傑就話唔會，當波士身兼秘書嘅工作，秘書就可騰出時間去協助處理諸如行政管理，又或者同客戶溝通，而運用試算表同PowerPoint等電腦操作， 就成為今日秘書嘅基本技能。
秘書因科技而變成多面手，辦公室內嘅通訊儀器亦有好大變化。許華傑話傳真機成為辦公室必備之物前，好多企業同外間聯繫，都係利用向大東電報局租用嘅電傳機，並由熟悉速記同打字嘅秘書負責操作，但當使用簡易嘅傳真機一出現，電傳機就消失無蹤。儘管依家傳真機對辦公室嘅重要性已不及過往，但佢仍保留一部，更不時收到地產代理發出嘅垃圾傳真。
陳麗欣投身衞生環保業務
資訊科技不但令到傳真機步向式微，就連生產辦公室消耗品嘅行業都受到衝擊。香港中小型企業聯合會第三副會長張皓翔本身係經營影印機同印表機用嘅碳粉生意，雖然目前未出現可取代影印機同印表機嘅文儀器材，但科技進步令到辦公室都趨向無紙化，難免減少對碳粉嘅需求，應對之法惟有積極咁去搵多幾個客戶。
香港中小型企業聯合會會董陳麗欣就謙稱自己係從事低端行業，高科技嘅影響非常有限。因十多年前嘅沙士疫情，佢投身衞生同環保相關嘅業務，為地盤工人或偏遠地區提供流動廁所，而收集嘅排泄物就會透過發酵程序，成為適合農耕嘅肥料。佢話業務看似無關科技，但喺消減惡臭方面就落過唔少工夫，更曾獲台灣方面頒發金獎予以鼓勵。
卓妮