中環出更：鍾嘉敏兒時有爸抱入懷 海盜船驚險化無形
香港出名嘅景點唔係特別多，主題公園就成為唔少大人細路假日會去嘅地方，好多人成長後重回主題公園，都會勾起童年回憶，就好似灣仔區議員鍾嘉敏早前出席一個喺主題公園舉辦嘅親子同樂日時，講起機動遊戲當中，印象最深刻嘅就係海盜船，話自己讀書時首次坐海盜船，離心力嚇到佢魂飛魄散，後來得到一個男子保護喎！唔通係浪漫經歷？
鍾嘉敏話，當年佢有些少畏高，但禁不住他人嘅慫恿，登上海盜船一嘗往來擺動嘅滋味，點知遊戲一啟動，佢就隨住海盜船搖來晃去拋上半空，愈來愈強嘅離心力嚇得佢魂飛魄散，好驚自己會被拋出船外，驚惶失措之際，爸爸嘅強力臂彎一伸，繼而抱佢入懷內，一切驚險都馬上化於無形。父母嘅保護對小朋友真係幾時都咁重要。
陳勇：珍惜每一段親子時光
同場仲有立法會議員張國鈞（Horace）同新界社團聯會理事長陳勇。以家長身份講起帶小朋友玩乜最好。Horace就話，要令小朋友開心，唔一定要帶佢哋去玩刺激度爆燈嘅機動遊戲，其實簡簡單單嘅繩網同滑梯，一樣可以玩到不亦樂乎，但前提係要有父母陪伴在側，小朋友先至會玩得盡情。至於陳勇就話，一對子女仲讀緊小學，自己都經常把握長假期，帶佢哋去外地旅遊，外國嘅主題公園，佢都幫襯唔少，仲會同小朋友去參觀各地唔同嘅博物館或藝術館添。佢話，擔心遲吓小朋友踏入青春期後，就冇咁親密，所以依家好珍惜每一段親子時光咁話。
轉個頭又見到觀塘區區議員顏汶羽，佢雖然未有小朋友，不過就認為去動物園都係親子活動嘅理想選擇，小朋友近距離接觸動物，印象都特別深刻，香港嘅動植物公園內都有一個動物園，不過規模太細，港人想同小朋友近距離親親動物，最近惟有去內地或台灣嘞，認為香港應設立具規模嘅動物園咁話。
卓妮