政情:朱慶虹教路 彈琴最緊要視力

香港地好多虎爸虎媽,細細個就逼小朋友去學游水、音樂,務求考到間好學校,本身係鋼琴家嘅南區區議會主席朱慶虹尋日講起,自己七歲開始學琴,以今日標準而言,算係年紀偏大,不過由於佢嘅媽咪係音樂教師,近水樓台,鋼琴造詣自然有番咁上下。佢仲話,彈琴最緊要唔係手指同聽覺,係視力喎,點解咁講呢?

不時驗眼防眼疾

南區區議會尋日舉行有關開展社區重點項目嘅活動,包括為區內年逾五十歲嘅居民提供免費眼科檢查,朱慶虹出席時講起,彈鋼琴要睇住樂譜,就必須保持良好嘅視力,無論手指有幾咁靈活,聽覺有幾咁敏銳,若無良好嘅視力,要演繹五線譜上嘅音符就難過登天,為咗預防眼疾,自己亦會不時去驗眼添。

不過,就算盡力保持眼睛健康,上咗年紀都不免會老花,佢就話去到視力衰退嘅階段,就要靠記譜啦,咁樣彈琴,就必須要對樂器掌握得相當純熟,初學鋼琴嘅人年紀愈大,就愈快面對睇譜吃力嘅情況,所以年輕就掌握彈琴嘅技巧,點計都着數好多咁話。係咪應該讚啲虎爸虎媽有先見之明呢?

第一手消息請下載on.cc東網iPhone/iPad/Android/Windows Phone Apps