政情：邵家臻申外出未死心 朱凱廸亂噏博助攻
正在赤柱監獄服刑嘅立法會社會福利界議員邵家臻（圖），其議辦仍繼續運作，早前試圖申請外出到立法會開會已被懲教署拒絕，但原來佢仍未心息。議員朱凱廸尋日喺社交網站透露，日前去咗探監，邵已再向懲教署申請外出，企圖喺下周三出席立法會大會提口頭質詢。
話口頭質詢須由本人讀出
朱凱廸又喺貼文聲稱，由於口頭質詢必須由本人出席讀出，否則不會處理，話邵家臻希望戴手銬出席大會，為打工仔發聲，似乎係想以此「助攻」，支持邵外出。不過，據了解，屆時有可能由專業議政嘅議員或工黨張超雄幫忙，但人選未定，就算指定議員無現身，《議事規則》係容許由內務委員會主席幫忙提問。根據紀錄，今年三月二十七日大會上，議員謝偉俊提口頭質詢時不在席，當時亦由內會主席代問。睇嚟朱凱廸嘅講法，同實情有相當出入嘞！
此外，朱又話，邵嘅精神唔錯，最唔適應係熱，因邵住喺監房頂層，走廊只有十二部電風扇，倉門通風唔夠，令倉內非常焗熱。佢亦引述邵話，有囚友入倉後就坐定，等到熱氣消散先可以瞓，希望懲教署可以容許囚友用工作薪酬買手提風扇，捱過夏天。