政情：今日你上鏡：會議期間睡魔急CALL？張宇人瞌眼擘大口
立法會會議經常又冗長又沉悶，過去唔少議員被發現喺會議期間被睡魔急CAll，瞌眼瞓「釣魚」，甚至瞓着咗。尋日喺立法會審議財政預算案期間，似乎又再出現同樣情況。飲食界議員張宇人（Tommy）就預算案嘅修正案表決期間，就瞌埋雙眼，成個身幾乎打平攤喺張櫈度，仲一度擘開口。唔知佢只係閉目養神，定真係瞓着咗呢？
攤喺座位緊閉雙眼
話說議員就預算案提出咗五十幾項修正案，立法會尋日朝早十點半就開始表決，一路玩到十二點，足足個半鐘，而呢段期間就發現Tommy攤喺座位度，仲緊閉雙眼，好似喺沙灘椅享受緊日光浴咁。
雖則審議預算案無論議員同啲官嘅發言都係三幅被，真係悶極，之但係要表決五十幾項修正案，班議員都唔敢走開，個個都坐定定，而啲修正議案係要逐個表決嘅，淨係投票都投到手軟。喺咁嘅情況下，Tommy如果都可以瞓着覺，咁就確係離奇喇。