政情：蔣麗芸生日願望 要一年先成真

希望引入海外醫生

原來佢嘅生日願望就係希望政府可以引入多啲海外醫生為市民服務，同埋為癌症病患者添加救命藥物。

Ann話，預計兩個願望都要用一年時間先會有成績，特別係立法會支援癌症病患者事宜小組委員會，只係成立咗一個月多啲，都需要時間跟進各樣工作。佢希望政府喺預防、新治療設備及藥物等方面都提供多啲支援，仲話相信用成年時間去做，一定會做到啲嘢咁話。

而尋日同Ann慶祝生日嘅就有其黨友兼立法會議員葛珮帆、鄭泳舜、陳克勤，Ann仲收到四個蛋糕咁多添。佢話，啲蛋糕係其黨友、地區同事、辦事處同事同埋朋友送嘅，估計佢哋冇夾過，所以就送咗四個咁多喇。不過佢就話絕對冇浪費，事關佢同事多，絕對食得晒喎。Ann收到嘅蛋糕就多喇，唔知佢今年收到乜嘢特別禮物呢？佢就話，同事相當環保，唔止唔浪費食物，連送畀佢嘅生日卡都係用環保紙做，唔怪得佢大讚好靚之餘，仲話好有心思同特色啦。