政情：小巴司機高齡化 馬僑生批政府歎慢板

建議降低發牌條件

馬僑生話石油氣小巴既免除電動車嘅充電時間，亦省卻環保柴油引擎嘅燒碳程序，所以業界都樂於採用石油氣小巴，如今宣布兩年後停產，大家都要為物色替代品而苦惱。

而佢亦明白石油氣小巴嘅市場需求有限，但喺環保潮流之下，車廠決定停產前應考慮一下社會責任。

石油氣小巴停產係遠慮，司機老化就係迫在眉睫嘅近憂。佢話唔少小巴司機年屆七十，為降低入行門檻以招聘較年輕嘅司機加入，舊年向政府建議將商用車輛駕駛執照嘅申領條件，由持有三年私家駕駛執照，降為一年。

佢話政府官員雖承諾將建議提交立法會討論，但今年立法會會期剩番兩個月都未見政府有任何動作，佢話全港小巴嘅載客量高達每日一百八十萬人，以運輸安全嘅角度，司機老化嘅問題實在不容再拖。