中環出更：延展決議唔見影 馬逢國抱病呻「唔好彩」
立法會尋日通過政府財政預算案後，原本就要處理延展《二○一九年娛樂特別效果（費用）（修訂）規例》修訂期限嘅擬議決議案，點知負責動議有關議案嘅體育、演藝、文化及出版界議員馬逢國就不在席，結果呢項議程就無法處理喇！究竟佢去咗邊呢？
有關法例嘅法案委員會原於上周二首次開會，但就取消咗，改為下周一再開，故要將法例修訂期限延展。該委員會只有馬逢國、郭家麒同楊岳橋三名議員。馬逢國就話，由於該委員會未選出主席，佢又係委員會最資深議員，立法會秘書處早前就通知由佢提出延展要求，不過佢就因身體有問題，以致尋日未能返回立法會開會，直言「咁啱唔好彩」，連預算案嗰一票都冇得投。
稱完成諮詢 冇乜嘢要再傾
馬逢國又話，雖然尋日處理唔到有關議程，但由於該法案係「先訂立、後審議」，所以都係七月一日生效。而佢答應秘書處提出延展時未諮詢晒業界，但最近已經完成諮詢，業界對於法案有關增加相關牌照費用等都冇意見，所以委員會其實都冇乜嘢要再傾喎。