中環出更：家具展銷徐加文擺脫停屍間陳設
工業界點先可以突破樽頸升級轉型？香港工業總會日前嘅D嘜認證頒獎典禮中，坐座有限公司策略發展總監徐加文，就講咗一間過去從事代工生產嘅企業，改變設計策略發展以邁向建立品牌嘅故事。
徐加文話一般嘅工業營運通常係按消費潮流而生產商品，情況就好似市場上要賣邊一種菜，企業就種邊一種菜，結果自家同競爭對手出嘅產品差別微乎其微，要得到買家嘅青睞就只有靠價格優勢嚟壓倒對手，然而要鬥賤價，又往往低處未算低。
佢所服務嘅一間生產家具企業就係遇上呢種捱打嘅困局，於是佢利用設計思維去制訂發展策略，譬如以感性元素設計講求品味又蘊含人生哲學嘅品牌；以國際都會名稱嚟為產品系列命名，取代原來以英文字母同數目字排列嘅產品編號，又以嶄新活潑嘅色彩配搭應用喺舊年嘅展銷會，掃走過往儼如停屍間嘅古板陳設。但佢話單靠包裝手段仍未足夠，下一階段將同新進設計師合作同改善市場營銷模式，務求進一步拉開同競爭對手嘅距離。
獲D嘜認證嘅青年工業家江浩榗就因應香港狹窄嘅居住環境，設計出可一物多用又或者摺疊慳位嘅廚具系列。雖然香港好多都係「無飯家庭」，但佢認為同家人外出用膳只係一種消費活動，點都唔及得親自下廚咁表達到對家人嘅愛同關懷，所以廚具始終有其市場。
李志文設計亞洲人適用眼鏡框
另一位獲頒D嘜認證嘅工業家李志文就由過往嘅眼鏡代工生產，蛻變成今日自設品牌。佢話全球化下工業界競爭激烈，要生存就惟有不斷改進，而佢就覷準流行嘅眼鏡品牌多數係依西方人尺碼製造，佢就設計適合亞洲人頭顱弧度嘅眼鏡框，有別於大路貨色先可以喺市場站穩腳。
卓妮