司機阿威與很多打工仔一樣，日日努力工作，希望有朝一日能夠成功「上車」做業主。今日阿威又忙碌到要在車裏吃飯盒，剛巧被行家阿友見到。阿友問：「阿威，有咩嘢驅使你要屈喺架車入面食飯盒咁辛苦呀？」
阿威回答：「係忙呀！我想快啲買到樓，所以用十分鐘快快手手食嘢，咁一陣就可以走多兩轉，賺多啲吖嘛。我日日都係咁，慣晒啦。」阿友大驚：「唔係啩，日日都係？咁對你健康唔係太好。」阿威說：「我又唔覺有問題，起碼食得瞓得，又冇胃痛。」
阿友回應：「第二個我就唔理佢，不過見同你咁熟，我唔想見到你有事。之前我去咗聽職安局嘅講座，知道佢哋最近做咗個關於打工仔飲食習慣嘅調查。結果發現，食飯時間唔夠半個鐘嘅受訪者，佢哋中度至嚴重肥胖嘅比例，明顯高過有多啲食飯時間嘅受訪者。」阿威頓悟：「你唔講唔覺，我又確實係比之前肥咗好多。但係點解食得太急會容易啲肥？」
阿友解釋：「如果食得太急，身體會比較難有飽肚嘅感覺，所以會愈食愈多，食多咗都唔知。食得太急又會令到血糖水平大幅波動，可以引致身體出現『胰島素抵抗』，增加患上糖尿病嘅機會。呢啲都係專家講嘅，唔係我亂噏！」阿威無奈：「原來係咁。不過為咗買樓，都冇辦法。」
阿友嚴肅地說：「咁你就錯啦，有咩嘢緊要得過健康！你由今日開始，比多少少時間自己慢慢咁食嘢，要多咀嚼先至吞落肚。仲有呀，食嘅嘢要健康，同埋有足夠嘅運動都好緊要！嗱，一陣你就早啲收工，同我一齊去跑吓步啦！」
職業安全健康局
www.oshc.org.hk