政情：今日你上鏡：唱唔贏小明 陳家豪打康樂棋攞彩
唱兒歌《小明上廣州》唱到街知巷聞嘅兒科專科醫生李家仁（小明）最近突然技癢，搵咗智慧城市聯盟金融科技委員會主席陳家豪對戰，估吓戰果如何？
約逛懷舊展對戰
鬥乜先？康樂棋囉！話說最近有一個懷舊展，仲擺咗康樂棋擂台。小明早幾日喺Facebook貼文同上載咗幾張相，原來佢趁中午時段去逛咗呢個懷舊展，約埋陳家豪出嚟打康樂棋，打過先知原來陳家豪係高手，小明仲話甘拜下風添！即係小明輸咗喇！
聽到小明咁讚，陳家豪都好謙咁話承讓承讓，仲大送高帽，講話冇辦法唱歌贏到小明，午飯時間小明約佢打康樂棋平衡一下心理，而贏咗小明，佢得到嘅獎品就係嶗山礦泉水同埋雙妹嘜花露水嘞！