政情：工作報告拍片 楊哲安自揭「第一次」

山竹時猛叫政府通渠

話說大部分區議員都有出地區工作報告，甚至親身上街派畀街坊，而Jeremy亦出咗份工作報告，但就話有啲街坊同佢講收唔到，於是佢就搞搞新意思，拍咗短片，用視頻方式講出呢份工作報告。呢段視頻日前出街，佢就自爆咗第一次係乜嘞！大家估唔估到？其實係同舊年超強颱風山竹襲港有關，就係第一次打好多電話畀政府部門去通渠，同埋第一次睇到咁多大樹一齊倒塌！

「山竹」已經事過境遷，呢啲問題都已經解決，之但係有件事未解決。Jeremy話依家嘅重點工作就係野豬，事關野豬經常喺山頂區出沒，對居民造成滋擾，而野豬好多時都喺垃圾桶摷嘢食，搞到附近衞生情況好差，所以佢希望居民行多兩步，將啲垃圾袋放入垃圾站，又話野豬係喺野外覓食嘅，呼籲居民唔好餵養，否則只會惹嚟更多野豬，兼且又預告遲啲區內會換上新型嘅垃圾桶，希望可以解決問題喎。

依家野豬問題蔓延全港，呢啲新型嘅垃圾桶作用有幾大？真係要試過先知。