政情：張宇人：劏魚指引惹反彈 局長虐我畜要坐監

立法會食物安全及環境衞生事務委員會尋日開會討論動物福利建議嘅公眾諮詢，會上唔少議員擔心修訂法例建議會對街市商販同漁農界帶嚟麻煩。漁農界議員何俊賢（高佬賢）批評政府消息混亂，早前傳出漁護署打算就電擊方式劏魚制訂指引，即刻搞到業界極大反彈同憂慮，佢仲舉例問「以後生淥白灼蝦有無問題？」唔知第時大家打唔打到邊爐咁話。

憂罰則太高 嚇死中小企

張宇人喺會上一嚟就申報自己唔係幾鍾意動物，跟住就連珠炮發係咁鬧政府無考慮啲中小企同街市商販，話食物及衞生局局長陳肇始「無嘢搵嘢嚟做」，佢又擔心法例修訂建議入面罰則太高，仲話已經嚇到中小企半死嘞！

陳肇始回應就話政府制訂動物保護政策嘅時候，會盡量避免擾民。漁護署副署長蘇炳民亦強調之前已經澄清過，署方唔會就電擊殺魚制訂指引，佢話明白業界擔心，將來或者會制訂啲「貼地」指引，如果業界跟住做就唔會有問題。

唔單止擔心法例搞到漁農界大混亂，議員蔣麗芸喺會上指目前唔少棄養個案原因同飼主對妥善照顧動物認知不足，例如寵物社交需要等，佢認為政府可考慮推出「一生承諾約章」，除非得到漁護署批准，否則唔可以棄養。佢仲建議飼養動物必須先接受強制培訓，並擔憂法例生效後會有很多飼主誤墮法網。

另一名議員鄺俊宇則批評現時關於動物保護的法例過時，擔心修訂法例生效後，漁護署會唔會有足夠人手執法，而坊間對謹慎責任定義有好多擔憂，動物義工或唔小心違反定義，屆時會「殺錯良民」。

陳肇始回應話目前漁護署已有提供培訓課程，法例生效後會考慮增加課程數目，而署方亦會視乎諮詢結果再調配人手，政府會推出指引供市民參考，動物保護團體不必擔心喺照顧動物過程中，容易違反謹慎責任制而誤墮法網。