中環出更：楊小玲推新興運動幫年輕人搵出路
依家有好多唔同類型嘅社企，而九龍樂善堂新任主席楊小玲日前喺就職典禮上，宣布計劃開設新社企「樂在新興運動」，期望藉此協助年輕人考取新興運動嘅教練資格，日後投入社區培養市民大眾熱愛運動嘅風氣。
楊小玲話新興運動喺外國流行咗一段日子，但目前仍未有一個清晰嘅定義，但大體上較傳統嘅田徑或球類運動有趣同容易上手，對體能嘅要求亦無咁激烈，兼且種類繁多，有「輕排球」、「芬蘭木棋」、「躲避盤」、「家庭羽毛球」同「氣場足球」等，適合唔同年齡一家大細都啱玩，更有部分適合長者或復康人士，就算坐輪椅都可以玩得不亦樂乎。
佢話早前同幾位樂善堂常務總理組隊，同某院舍嘅長者對壘新興運動「硬地滾球」，結果「長者隊」完勝「總理隊」！佢又話已向政府申請資助，倘獲批核，新社企喺今年秋季就會啟動，話多做運動不但鍛煉肌肉同心肺，促進新陳代謝，連皮膚都會靚啲。
蘇裕康話睡眠對護膚好重要
轉頭見到第一副主席陳李玉佩、第三副主席蘇裕康同常務總理陳達華。講起皮膚，蘇裕康雖屆「入五」之齡，但皮膚仍然相當光滑，原來佢由廿年前經營嬰兒用品生意以嚟，一直都有用自家研製嘅有機嬰兒護膚品，令佢嘅膚質同年輕人相差無幾，佢話想保持皮膚良好，睡眠都好重要。
紫荊青年商會前會長張李施源同會務顧問陳淑芝亦有嚟撐場。從事美容業嘅張李施源話華人婦女有一個普遍現象，就係想方設法防止被陽光曬黑。對於風行內地嘅防曬神器「面堅尼」，佢認為做法太過極端，事關阻隔陽光並唔係保護皮膚嘅好辦法，而市面上嘅防曬乳霜已經有唔錯效果，運動出汗嘅話只要補搽防曬就得嘞。
卓妮