政情：戴耀廷在囚 派去剪線頭

朱順雅話戴耀廷被囚喺二人倉，佢唯一嘅室友對佢亦好照顧，令初時覺得獄中節奏頗難熬嘅佢，亦總算適應過嚟，又引述戴耀廷話近年已建立咗慢跑習慣，最長試過跑二十公里，所以喺石壁嘅日子，佢會善用每星期三個可以外出跑步嘅下午，每次繞足球場跑四十分鐘，約二十多圈，一般可完成五到六公里，而有啲囚友亦會向佢查詢或請教一啲法律嘅問題。

陳健民未賺夠錢買「白飯魚」

陳健民就被囚喺三十人倉，朱引述陳話同倉嘅囚友幾乎九成都吸煙，但啲囚友都好尊重佢，吸煙時，會選擇盡量遠離佢，避免佢受到二手煙嘅困擾。佢又引述陳健民話，每日都堅持運動，習慣清晨五點幾就起床坐禪同慢跑，但至今未賺夠錢添置合適嘅跑步鞋，要喺獄中努力工作，希望可以盡快買一雙「白飯魚」去跑步。陳健民被分配做木工，喺晚上會睇書之外，亦會幫一啲囚友補習英文，同佢哋傾吓偈咁。