政情：盼與佛教睇齊 李鋈發倡儒道有假放
佛教講眾生平等，不過同宗教有關嘅公眾假期，香港就唔係咁平等嘞。博愛醫院前主席李鋈發近日參與浴佛儀式時講起，華人社會通常係講儒釋道三教合一，佛教以外，儒同道嘅信眾都唔少，然而後者就只有非假期嘅道教日，前者雖曾爭取假期，但就無下文，既然佛教都可以列為公眾假期，儒道都應該要有假放。
未深入研究藍白領假期
李鋈發話，只要唔對服務或生產構成妨礙，自己作為僱主都係唔介意一年多兩個「紅日」。勞工團體經常埋怨，話白領放嘅銀行假，多過藍領放嘅勞工假，到底兩者嘅假期應唔應該劃一看待呢？李鋈發坦言對呢個問題未有深入研究，估計可能係因白領同藍領嘅工作性質不同，以致兩者嘅假期日數有出入。
佢又話，若果忽視每日嘅工作時數，拘泥於一年有幾多日假期，其實意義不大，所以佢覺得與其爭拗劃一假期，不如勞資雙方先就標準工時達成共識咁話。