政情：今日你上鏡：未婚陳克勤 送花畀何人？

玫瑰花嘅花語同愛情有關，好多男士都會買嚟畀心儀對象，唔少女士都鍾意收花。年逾四十、尚未娶妻嘅立法會議員陳克勤（右），最近亦都送咗一紮紅玫瑰畀一個女人，喺社交網站嘅相片中見到，二人合照背後嘅牆上都有好多玫瑰添，唔知邊個女人咁幸運，得到陳克勤咁嘅安排呢？大家唔好誤會呀，其實呢個女人並唔係佢女朋友，亦唔係佢媽媽，係近日做咗大埔區議會主席嘅黃碧嬌（左），黃碧嬌本身係大埔區議會副主席，近日榮升主席，陳克勤只係送紮花賀一賀佢啫！其實玫瑰花唔難買，普遍女士都會鍾意，所以千祈唔好一見到有人送花收花就亂咁諗呀！