政情：立會混戰 盧偉國引歌詞批有人盡情破壞
眾所周知，立法會工程界議員盧偉國（WK）吹得、彈得亦唱得，佢前日下晝去咗青衣城派花，預祝市民母親節快樂。佢喺社交網站貼文話，前日朝早立法會修訂逃犯條例嘅法案委員會會議被暴力行為破壞，無法完成選主席程序，令人憤怒！仲引用咗《難為正邪定分界》嘅歌詞，形容有人「努力興建」，有人「盡情破壞」，感到慨嘆！
母親節琵琶奏 《念親恩》
點解話WK吹得？唔係話佢吹水，而係佢吹色士風了得，佢話去到青衣城派花，見到街坊拖男帶女嘅溫馨場面，佢心情都輕鬆咗啲，亦出動咗佢支「鑽石色士風」，吹邊首歌？咪就係《念親恩》囉！
適逢尋日係母親節，WK亦喺社交網站上載一段短片，佢話媽媽同爸爸都已在天家，而佢唔用色士風，改用琵琶，同樣彈奏一小段《念親恩》，感謝父母恩，亦祝大家母親節快樂，共享天倫咁話。