中環出更：胡君孟笑談教育：家長老師最難搞
本港嘅催谷及競爭文化令家長同小朋友承受好大壓力，上海總會（總會）青委早前就邀請正向家長學院創院院長胡君孟（Rex）去分享，唔少家長都有去聽書添。Rex做咗十幾年心理諮詢及輔導，見過形形色色嘅離婚或家庭問題，其中唔少分歧根源都係小朋友嘅管教問題，故此六年前成立正向家長學院，希望令家長更加了解小朋友心理，為大家減減壓。不過佢笑稱，世界上最難搞嘅兩種人就係家長同老師喎！
育有一對龍鳳胎嘅總會理事金志菁有份促成今次講座，原來佢都覺得上堂學下做家長係好啲。佢話，想做律師或醫生嘅人，必然要讀法律或醫學相關知識，但係為人父母好似冇咩課堂可以上喎，自己早前跟過Rex上堂，了解小朋友喺唔同成長階段有唔同嘅心理轉變，覺得好受用，所以叫埋老公、父母及家姐都去上堂添！佢舉例話，三至六歲嘅小童好鍾意主動做嘢，譬如想斟水畀父母，但係如果倒瀉水，一般都會被責備，咁樣就可能影響佢哋日後嘅主動性喇。
香港鐘表業總會永遠名譽會董馮子琳都應總會青委會主任委員高鼎國及太太張尹馨邀請去聽書，呢幾年馮子琳好少出現公開場合，原來係忙於結婚生仔，話咁快已有兩個仔。名人周國豐及太太黃泳霖（Jenny）都有到場，腹大便便嘅Jenny下個月就嚟生，不過見佢仲係面尖尖，佗得好Fit，真係犀利。
陳浩寧生第三胎
傳承學院榮譽主席陳裕光個女陳浩寧仲犀利，唔講完全睇唔出啱啱生完，仲未滿月，連產後瘦身嘅煩惱都冇。佢原本已有兩個仔，今次生多個女，直言老公趙益坤最開心。卓妮見趙益坤嘅身形脹咗好多，睇嚟太太坐月期間，佢都進補埋一份喇！
卓妮