政情：趕潮流初嘗芝士奶蓋茶 陳曼琪飲到成嘴白泡
呢兩年芝士奶蓋茶大行其道，原來香港中小型律師行協會創會會長陳曼琪（Maggie）竟然未飲過。佢日前喺社交網站上載咗去深圳玩嘅相，仲貼文話係第一次飲奶蓋茶，承認「我慢了趕潮流」。不過，睇佢飲奶蓋茶飲到成嘴都係白泡，一臉稚氣個樣，都真係幾搞笑。
獲網友邀請去廣州玩
佢飲完奶蓋茶，仲去咗深圳灣口岸附近食晏，又上載咗幾幅點心相，仲大讚好味，好多網友都話睇到流口水，有網友仲即時問佢幾時去廣州作客添。佢就反問有乜好去處，而嗰位網友直情「廣州通」咁，數咗去邊度「搵食」、睇廣州塔夜景嘅最佳位置等，仲有介紹去邊個商場買衫，總之衣食住行乜都有，搞到Maggie心郁郁，話下次必定要去廣州逛下先得喎。
呢位網友咁有誠意，平時忙到冇時停兼且要四圍飛嘅Maggie，睇怕真係要度吓期，去廣州玩喇！