中環出更：容海恩奇招 出動囡囡抗泛民拉布
最近立法會民主派同建制派關係緊張，喺民主派拉布下，會議屢爆混亂場面，審議《逃犯條例》修訂嘅法案委員會今早開會，有指民主派要預先佔領會議室玩嘢，立法會議員容海恩（Eunice）就諗到「奇招」對抗民主派拉布，原來「終極武器」就係佢囡囡袁昌蔚。究竟搞邊科？
話幫手霸住主席位
話說Eunice趁母親節前夕與同樣已為人母嘅南區區議員陳家珮（Judy）茶敍，仲帶埋各自嘅囡囡出席。Judy就問Eunice會唔會帶囡囡感受一下周三舉行嘅立法會大會，行吓會議廳外嘅綠地氈。Eunice即耍手擰頭話唔會，仲形容會議廳危險，係唔安全嘅工作環境。不過Eunice好似突然靈機一觸，就同囡囡講︰「反正你都要食夜奶，不如今晚喺office（辦公室）留守，聽朝抱你坐喺個主席位」，實行想叫囡囡幫手霸住張主席櫈，等民主派冇符。
之後兩位媽媽又互送禮物，Judy送咗盒即食粥仔同電子琴畀Eunice，琴鍵顏色鮮艷。點知Eunice就同囡囡講︰「乜嘢色都要識，不過黃色就唔好學喇。」唔通個女咁細個，Eunice已怕佢變「黃絲」？
卓妮