中環出更：憶考AO被施壓 張雲正堅持己見突圍
又到應屆畢業生求職面試嘅季節，曾出任公務員事務局前局長嘅保險業監管局行政總監張雲正（Clement）早前同太太Florence現身馬場，就講起自己當年考政務官（AO）時駁嘴駁舌，當時嘅外國人面試官用唔同方式打擊佢同畀壓力佢，似係想令佢驚或發脾氣，但佢都堅持自己嘅立場，喺唔發脾氣下同面試官爭論，結果就請咗佢喇，直言當年都感到意外。
Clement話因為當年成績麻麻，以為多數考唔到AO，但面試時都本住「份工冇就冇」嘅諗法堅持己見，後來先知面試官係欣賞佢不輕易改變立場、唔會被壓力左右嘅態度。Florence聽到就即刻笑笑口話，唔怪得婚後佢有時會堅持己見啦。
Clement又講到，後來到佢去做面試官，見到近年有啲考試成績好好嘅求職者好似考試機器咁，答問題時意圖搵考官鍾意嘅答案，答案左搖右擺，佢首先就會踢走呢類求職者。因為開明嘅僱主並非要搵考試機器或迎合自己嘅人，而係要搵適合公司嘅人。
梁高美懿：留人才靠即時福利
講開見工，曾喺銀行界多年嘅馬會大董梁高美懿就話，每代年輕人都有唔同諗法，以前嘅求職者會希望喺同一間機構搵到自己嘅事業，但依家嘅年輕人會希望多元化啲，就算留喺同一行業，都未必想長期任職同一間機構，同佢哋講退休福利可以「慳番」。依家啲求職者對超時補水已冇乜興趣，要留住人才就要提供即時福利如生日假、花紅、安排義務工作機會等。
同場嘅香港工商總會主席王庭聰就話，現時最低工資水平真係偏低，覺得起碼要增至四十元。但佢亦承認依家僱員同僱主都好難做，因為生活成本太高，特別係啲樓貴到離譜，希望政府起多啲公屋，幫到基層咁話。
卓妮