政情：八網難逃：林超英晒舊相 網民讚靚仔

點解林超英突然緬懷舊事？原來嗰日係五月四日，佢貼文話「五四」對佢有特殊意義，事關佢四十五年前喺彌敦道走上山入咗天文台，開始天氣預報員生涯，然而二○一九年喺從荔枝窩走上山到梅子林，幫手除草，為鄉村復興出一點力。同樣「其路漫漫兮」，但又充滿希望。

當時身處舊天文台總部

有網友睇到林超英呢張舊照，即刻留言讚佢靚仔。其實呢張相係喺一九八○年影嘅，當年林超英身處舊天文台總部1883大樓拍攝有關天文台職員日常工作嘅短片，而1883大樓喺一九八四年被列為香港法定古蹟。

林超英喺一九七四年加入天文台出任科學主任，二○○三年升任台長，喺二○○九年退休，呢份工足足做咗三十五年咁長，任內亦推動好多改革，當然都唔容易做喇，而喺佢退休後，致力推動環保工作，多年嚟更落手落腳保育荔枝窩同發展生態旅遊，期間亦遇到唔少困難同阻力，可能因為咁而慨嘆保育工作「路漫漫」。