星期天早上，明哥外出遇到鄰居阿輝︰早晨阿輝！今日休息有咩做啊！
阿輝︰我約埋幾個朋友一齊打牌啫！
明哥：問親你都係打牌嘅！
阿輝︰你有所不知啦！其實我啲朋友一個做收銀、一個做售貨、一個做侍應，我做保安，返工成日行行企企，雙腳又攰又痛，一個二個唔係有下肢靜脈曲張，就係足底筋膜炎，所以趁休息就轉做手部活動，等對腳抖抖先！
明哥：開工要企成日都好慘！
阿輝：係呀，不過我哋啲老闆都知我哋辛苦，有啲可以坐住做嘅工作，就會安排我哋坐住做嘢，好似收銀咁。或者喺工作位置提供椅子，畀員工喺情況許可下坐低，例如保安、售貨、侍應，僱員喺合適時段可以坐吓稍事休息。又或者安排轉換工作崗位，改變工作姿勢等，唔使企足成日。
阿輝繼續道：我哋個櫃台設計都大有玄機，後面加咗啲可以用嚟做腳踏嘅矮欄，開工時可以將左右腳交替放喺腳踏上面，以紓緩站立工作時嘅疲勞。唔講你唔知，平時我站崗位置地面都鋪上有吸震功能嘅地墊，可以減少腳部所承受嘅壓力。開工企咗兩三小時後就可以安排有十至十五分鐘坐吓休息，做吓伸展運動鬆弛吓腳部。對腳係自己嘅，開工梗係要着對舒適又有承托力嘅鞋，對鞋墊仲有吸震功能添！你呢，一大早去邊？
明哥：我揸的士嘅，開工已經坐到怕怕！唔使開工我梗係去行吓山又或者行吓街啦！
職業安全健康局
www.oshc.org.hk