政情：夾魚畀人好服侍 何君堯唔認係君子
早前都講過，立法會議員何君堯變身搵食達人，搞咗個網上節目四周圍搵食，首集已經大爆金句，新一集竟然話自己唔係君子。因乜解究？
話說何君堯尋日喺Facebook上載段短片，今次貼地氣啲介紹民間美食。估吓係邊度？畀個貼士大家，佢係「福建女婿」喎，估到未？係俗稱福清街嘅二坡坊，嗰度係福州語系港人嘅聚居地，到處都可以搵到福建食材同食肆。
荃灣區議員林發耿首先帶佢去一間買福建食材嘅舖頭，見到大大粒魚蛋，佢好驚訝咁話：「嘩！大過乒乓波，直情好似高爾夫球咁。」跟住就好心急咁催促快啲搵撻地方煮嚟食喇！煮熟嘅魚蛋發得仲大，佢就係咁話：「只能夠叫佢做獅子頭（上海菜），我要食獅子頭。」咬落去發現魚蛋有餡，佢就好開心咁話：「我食咗即係我有內涵喇！」
拎肉燕返立會食 咁就好太平
跟住又食「肉燕」（即係魚皮餃），話係用嚟宴客食嘅，取其諧音，食咗就會好太平，佢即刻打蛇隨棍上話要拎去立法會食，咁立法會就好太平嘞！
最後一道菜係蒸魚，林發耿就讚佢好君子o架，會先夾餸畀人哋，佢就接住話：「我唔係君子，我係君堯。」咁幽默風趣，搞到身邊嘅人笑爆嘴。