中環出更：議員預算案提修訂 劉怡翔：一個都唔容許

多名議員去信炮轟

劉怡翔喺信中提到，相信議員提出修訂要求削減政策局或部門開支，並無認真看待後果，若通過將令主要公共服務陷入混亂，嚴重影響政府運作，削減政治委任官員或公務員等薪酬，會嚴重妨礙政府履行身為僱主嘅合約同法定責任，批評有關修訂只會佔用議會時間，唔會達致任何目的，亦唔會提供合理而真正嘅選擇方案以供審議，又批評部分修訂技術上有誤、不同議員同時動議重複嘅修訂等。

多名議員去信對劉嘅講法表達強烈不滿，其中郭家麒提到問責官員需為過失負責，削減部門首長薪金係理所當然，能令政府體現問責精神，削減部門運作開支更係反映該部門有空間改善。

最終，立法會主席梁君彥決定批出五十六項修正案，其餘一百項不獲批，將預留約三十八小時討論及表決，與去年大致相若。翻查資料，今次係自梁出任主席以來，就撥款法案批出最少修正案嘅一次，佢喺舊年批出六十五項，前年批出一百八十五項。梁指今年獲准提出嘅修正案比率達三成六，係近年最高。

卓妮