政情：今日你上鏡：劉吳惠蘭夠環保 買餸自備購物袋

早幾日勞動節公眾假期，唔少人都趁放假輕鬆一吓。當日下午我哋就見到公務員敍用委員會主席劉吳惠蘭（Rita）孖住老公喺中環太子大廈一間超級市場閒逛，但行咗一陣就走人，最後買咗啲肉類、水果同番茄等，話係買嚟準備返屋企煮飯喎。不過，我哋留意到Rita好有手尾，將超級市場嘅購物車同購物籃分開放回原位，仲響應環保自備購物袋買餸，睇嚟環境局局長黃錦星應該搵佢幫手宣傳吓。