政情：泛民拉布玩出禍 區諾軒入委員會遭拒
民主派近日喺立法會不同會議都拉布玩嘢，之前立法會大會先因民主派議員點算會議法定人數搞到流會，之後又有法案委員會選唔到主席，而建制派亦都出招反擊。喺兩大陣營大鬥法下，令議會陷於僵持局面，而緊張嘅氣氛仲蔓延到尋日嘅立法會《二零一九年選舉法例（雜項修訂）條例草案》委員會。話說民主派議員區諾軒申請逾期加入該法案委員會，但就被建制派議員質疑係加入委員會拉布。結果喺議員數目佔多數嘅建制派反對下，否決咗區嘅申請。作為民主派一分子，區會唔會覺得今次玩嘢玩出禍呢？
何俊賢恐區加入後會阻礙審議
有關法案委員會早於四月已成立，尋日係舉行第三次會議。區早前就去信該法案委員會主席張國鈞，話有關條例草案涉及多個界別事宜，以及影響市民政治參與權利嘅重大改革，佢希望加入委員會參與擬議界別資格制度嘅審議，以監察本港政制發展。該法案委員會尋日開會就首先處理區嘅申請。由於區並唔係因為身體不適或不在港而無法喺報名期申請加入委員會，所以委員會需要就是否批准其加入表決。
唔少立法會議員都會喺委員會成立之後先申請逾期加入，一般情況下都唔會有爭議，就連曾經喺立法會換屆選舉同區諾軒對壘嘅批發及零售界議員邵家輝，尋日亦都話支持區加入。點知就半路殺出個程咬金，漁農界議員何俊賢（高佬賢）就表明反對，話最近啲法案委員會立立亂，相信區都有份拉布，覺得區加入咗委員會後會阻礙審議。高佬賢仲提到，因為呢個時候比較敏感，所以要暫時緩一緩咁話，似乎係質疑區加入委員會係想玩嘢喇。
盧偉國指工作近尾聲 不應批准
工程界議員盧偉國雖然話唔會猜度區諾軒加入委員會嘅動機，但就認為委員會工作都已經接近尾聲，除非有好特別嘅理由，否則都唔應該批准。
最終委員會就將區嘅逾期加入申請投票處理，但就只得邵家輝一個投贊成票，包括高佬賢同盧在內嘅五位建制派議員就投反對，區最後只能以列席者身份出席會議。
議員要加入委員會開會本來都係為履行職責，建制派嘅勞工界議員何啟明因工作有調整，上月申請逾期加入立法會保安事務委員會都獲批。今次區諾軒嘅申請被否決，建制派是否持雙重標準，相信市民心裏自有答案。