中環出更：劉國勳開火 炮轟范國威唔落區
作為立法會議員自然要同當區市民保持聯繫、代市民發聲。不過本身係新界東立法會議員嘅范國威（Gary）就被質疑唔落區，究竟乜事？
政府喺古洞北同粉嶺北嘅發展計劃影響好多當區居民，居民嘅安置同賠償問題都要靠議員幫手。立法會財務委員會尋日審議有關發展計劃嘅工程撥款，身兼北區區議員嘅立法會議員劉國勳就向Gary開火，批評身為新界東立法會議員嘅Gary鮮有落區協助居民，仲話新界西立法會議員朱凱廸仲出現得多過Gary。
Gary聽到後隨即反擊，指建制派贊成有關發展計劃，先搞到居民被迫遷咁慘，雙方一度互罵，要財委會主席陳健波（波哥）出聲制止，波哥甚至一度警告Gary，話如果再唔收聲就會趕佢出去。
范反斥劉落區幫唔到手
Gary終等到自己發言時再反擊，並讀出一段手機WhatsApp短訊，聲稱係受影響居民傳來，質疑劉國勳雖然經常落去，但幫唔到手解決問題。劉聽到後就反問：「係咪我又要讀我啲WhatsApp？」暗示佢都聽到好多批評Gary嘅聲音。兩人你一言、我一語，最後又要波哥制止先至平息。
卓妮