中環出更：唔急用5G網絡 張浩然：兩年後先換
智能手機已成為生活嘅一部分，最近更因中美政治角力而炒熱5G（第五代流動通訊系統）話題。香港蘇浙滬同鄉會會長兼上海總會副理事長張浩然早前就搵咗香港大學電機電子工程系助理教授黃凱斌舉行講座，同兩個會嘅成員講吓5G係乜。黃話自己有四、五部手機，換手機換到好攰。估唔到呢句說話引起好大共鳴，連張都話就算有5G網絡都暫時唔換機住，等兩年後先喎。
黃凱斌話，手機由只具備語音通話功能嘅1G發展到5G，差唔多每一個G維持流行十年。但5G唔係下載速度更快咁簡單，因為其功能已超越智能手機，包括自動駕駛及遙距手術等都將變成可能嘅事。有人問點解要買5G手機，仲話對買手機覺得攰。佢就話，有時搭的士見司機車頭擺咗六部手機咁多，仲攰添喎。
張浩然亦都話自己唔係跟高科技跟得好貼嘅人，所以手機會用到啲軟件唔得或好慢先換。咁點解關注5G呢？原來係佢好友九龍扶輪社前會長楊天源介紹，因為早前黃凱斌去過扶輪社講5G，楊聽完覺得好好，所以就介紹畀老友。難怪張形容楊係媒人喇。
高叔平好期待體驗新功能
上海總會副理事長高叔平（Henry）、周偉偉及常務理事車弘健都有去「聽書」。Henry日日忙到飛起都抽空去聽，話係因為見到美國佬日日喺度講5G，但都唔知5G係乜。佢都認同成日換手機好攰，因為次次換都要再適應過，所以兩年先換一次。而車亦都係，不過佢就好期待用5G手機，因為速度快，又有好多新功能，若有得用，梗要第一時間體驗吓。
卓妮