政情:建制壟斷正副主席 大埔區會被轟變一言堂

大埔區議會早前因前主席張學明退下火線而需另選主席,結果由原本為副主席嘅建制派區議員黃碧嬌接棒,黃成為當區區議會新主席,但副主席職位就懸空。事隔半個月,大埔區議會尋日召開特別會議以選舉副主席,與黃屬同一政黨嘅當區區議員鄭俊平最後當選,令正、副主席之位都被建制派包攬,因而被其他議員鬧爆建制派壟斷,令議會變為一言堂。

劉勇威批違背民主精神

與黃碧嬌同屬民建聯(民記)嘅鄭俊平同代表大埔民主聯盟嘅大埔區議員劉勇威,尋日分別獲提名參選副主席,當區區議員任啟邦會上提出候選人要接受議員質詢,雖然劉贊成,但鄭就認為淨係花三分鐘宣讀政綱就足夠,最後任嘅建議被否決。鄭喺宣讀政綱時話自己曾出任區域市政局議員,又做過大埔區議會正、副主席,認為自己能夠勝任。

不過,劉勇威就認為正、副主席應由唔同政黨人士出任,批評民記壟斷同一黨獨大,違背民主精神、貽笑大方,不過你有你鬧,惟鄭最終都以十五票對六票擊敗劉。

第一手消息請下載on.cc東網iPhone/iPad/Android/Windows Phone Apps