政情：陳學鋒感慨新一代 中西區返工都嫌遠
香港係彈丸之地，人口密集，市場有限，所以成日都聽到有人叫香港啲年輕人去其他地方闖吓，例如去內地發掘更多發展機會。不過，中西區區議會副主席陳學鋒就覺得現階段唔太可行，事關佢最近招聘助理時就碰咗幾次壁，先後有幾個年輕人應徵，原本都覺得佢哋條件唔錯，有意聘請，可惜最後竟然因為返工地點問題而唔做。
陳：何必嚟見工
原來幾個年輕人都住喺新界，例如屯門、元朗、粉嶺等地，所以嫌去中西區返工太遠，陳學鋒就覺得佢哋連中西區都唔願去，又點會去更遠嘅地方工作呢？陳仲話，目前其議辦都有助理住喺新界，係最近先出現年輕人返工嫌遠嘅情況，覺得年輕人心態唔同咗。
不過，佢話有一件事諗唔明，就係幾個年輕人應徵時已經知道要喺中西區返工，如果係地點問題，應該一早就考慮過，何必嚟見工呢？所以佢結論係，如果年輕人保持呢種返工嫌遠嘅心態，就算其他地方有更好嘅條件都未必叫到年輕人去發展喇。