政情：私營龕場 發牌慢到笑死人 議員齊轟食環署

立法會財務委員會尋日審議食環署有關開設一個高級首席行政主任嘅編外職位嘅申請。該署話，因為要加強食環署轄下嘅私營骨灰安置所事務辦事處嘅首長級人員支援，所以要開設有關職位。立法會議員麥美娟會上就批評食環署，話私營骨灰安置所發牌制度實施近兩年，但至今只發出三個牌照，速度咁慢真係笑死人，搞到市民早早為先人買落龕位，都因為骨灰安置所未發牌而未能為先人上位。

陳克勤促考慮初衷 減少關卡

曾出任《私營骨灰安置所條例草案》委員會主席嘅陳克勤就話，當日設立發牌制度都係為咗保障消費者權益，同埋為合資格嘅私營骨灰安置所拆牆鬆綁，直指現時運作有問題，發得三個牌並唔理想。佢仲引述業界批評政府吹毛求疵，認為政府應考慮初衷，減少關卡。而做過食物及衞生局局長政治助理嘅議員陳凱欣亦直言唔滿意政府發牌速度，又話骨灰問題敏感、複雜、有難度，而且涉及土地、屋宇等唔同範疇，質疑單靠食環署原有人員難應付喎。

鄭松泰批開設職位只為卸責

而民主派就質疑食環署就算增加人手，都解決唔到問題。其中議員梁耀忠就話，未獲發牌嘅骨灰安置所主要都係涉及文件不足問題，事關有關骨灰安置所可能明知不符條件，又或者唔想進行相當工程以符合要求，先會拖拖拉拉唔交文件，故此發牌慢同該署人手無關。而議員鄭松泰就認為歸根究柢係個機制根本唔合理，批評食環署開設職位只係為咗推卸責任，用新職位作為擋箭牌。

畀議員由頭鬧到尾嘅食環署私營骨灰安置所事務專員賴黃淑嫻就解釋，現時嘅申請涉複雜嘅跨部門問題，新加嘅職位會檢視發牌流程有冇加快同簡化嘅空間喎，雖然開設職位申請最終都獲得通過，但如果食環署仲唔改善，相信呢種場面只會陸續有嚟喇。