政情：今日你上鏡：林正財休閒造型 網友讚後生
身兼行政會議成員同安老事務委員會主席嘅林正財，平日大多着西裝，間中亦見到佢一副單車Look，事關佢熱愛踩單車，但係日前佢又轉咗一身潮Look（圖），畀網友大讚變Young。
林正財喺Facebook上載咗兩張相，佢着咗牛仔褲，身穿粉紅色V領Tee配咗件薄嘅白色恤衫，背景分別係畫上布藝同樹嘅石牆，色彩繽紛，有網民大讚「今天好young look 啊！」亦有網民話「沒穿全套西裝的林醫生有點看不慣」。不過，睇佢笑得咁開心，相信佢對呢身裝束好滿意，仲樂在其中。
去南豐紗廠打卡
究竟佢身處喺乜嘢地方？咪就係荃灣南豐紗廠，嗰度已經成為文青熱點嘞！
（互聯網）