政情：林大輝殺入演藝界 客串《鐵探》
立法會前議員林大輝一向涉獵唔同範疇，最近又有全新搞作，竟然係走入公仔箱客串電視劇。嗰套電視劇就係《鐵探》，前日播出嗰集，見佢唔單止有特寫鏡頭，連對白都唔止一句，絕對唔係路人甲之流，唔通佢有意向演藝界發展？
花兩個鐘就拍完
大輝接受查詢時就話自己一向作多方嘗試，尤其無做議員後多咗時間，試新事物當識朋友都好。佢就話今次花兩個鐘頭就完成拍攝，其中最花時間係化妝同裝身，雖然以前作為議員接受訪問都要簡單化妝，但拍劇對妝容嘅要求就有所唔同。咁佢有冇NG呢？佢就話唔知算唔算，因為要從唔同角度拍攝方便剪接，所以都拍咗幾次喇！
經過今次親身體驗後，佢就大讚香港電視同電影質素高，所以先會喺東南亞、內地等市場有捧場客，其中香港演員仲好大可塑性，古裝同時裝都難唔到咁話。咁未來仲有冇機會見到佢演出？佢笑住話應該有第二次機會嘅，咁真係要落足眼力睇電視喎。