政情：何啟明自爆密會「男友」偷食

主角就係立法會勞工界議員何啟明，佢仲要喺Facebook（Fb）自爆密會「男友」添！咁揚，老婆情何以堪？講吓笑啫！

佢日前喺Fb貼文，話喺上海參觀期間約咗「男友」，呢位係在滬港人，仲係舊相識。真係舊相識嚟o架，佢哋相識咗十五年，係舊同學兼舊同事，咁啱佢去到上海，當然相約聚吓舊，仲一齊飲啤酒，食串燒添！既然係老朋友，老婆當然唔會詐型喇！

肥老闆食埋人哋份東坡肉

講到食，金融服務界議員張華峰（肥老闆）就開心囉！事關佢日前出席一個晚宴時，食到佢嘅至愛——東坡肉。肥老闆喺Fb上載咗張相，見佢好開心咁捧住五件東坡肉，仲貼文話大家知佢鍾意食東坡肉，而喺晚宴上就有呢道極品，令佢垂涎三尺。佢話席間有人仲畀埋自己嗰份佢食添，搞到佢好過意唔去喎。佢唔係食晒五件東坡肉呀？