中環出更：六月新娘嚴紀雯 升呢人妻嗌緊張
古語有話「六月新娘」最幸福，仁濟醫院總理嚴紀雯（Carmen）嚟緊即將做六月新娘，自然幾時都洋溢着幸福嘅笑容。早前喺一個場合見到Carmen同男友Jeffrey，問佢哋籌備婚禮有冇壓力，Carmen笑笑口話用咗年半時間籌備，所以都好順利，不過諗起即將升呢為人妻，佢就有些少緊張，所以要趁未來個幾月時間，好好享受做「人哋個女」嘅幸福喇！
Carmen話結婚之後就要自己打理一頭家，同以前喺屋企做人哋個女好唔同，所以諗起都有啲緊張。呢一日係Carmen嘅爸爸、香港電子業商會執行委員嚴玉麟嘅香港新總部大樓舉行落成開幕儀式，Carmen媽媽嚴徐玉珊都喺度，掌上明珠就嚟出嫁，嚴太坦言心情好複雜，一方面唔捨得，另一方面又好開心個女搵到個咁好嘅歸宿，嚴太仲一輪嘴讚女婿「好好、好好」添！
當日仲有好多政商界人士到賀，並趁機參觀光電行業嘅最新科技趨勢。嚴玉麟話現時家電設計嘅新趨勢係融入人工智能，感覺時尚啲，仲預告佢哋設計緊用於雪櫃。
單日堅：電器未壞好送畀人
香港遊樂場協會主席彭詢元同副主席單日堅都有到場，講起依家啲電視、雪櫃等家電好襟用，十年都唔壞，令唔少想追新款嘅用家好「煩惱」，佢哋就不約而同話，唔使煩，可以送畀佢哋喎！原來遊樂場協會都有回收電器轉送畀有需要嘅人，不過單日堅就提醒話：「記得未壞之前就好送畀人喇！」
卓妮