由立法會進出口界議員黃定光（象哥）牽頭搞嘅新田購物城去年初試業至今，一直都係拍烏蠅，商戶最近仲被追收過去一年幾免收嘅租金，搞到唔少商戶都準備打退堂鼓，象哥尋日話，之前提供免租已經係仁至義盡，當中有啲商戶唔做生意，搞到旅客去到購物城「冇嘢睇」，造成惡性循環喎；但商戶就唔認同，仲形容象哥嘅言論「難聽過粗口」。如果大家關係搞到咁惡劣，睇怕想挽救新田購物城就難上加難喇。
