政情：懷孕排到生埋仔 容海恩仲未輪到託兒所
香港託兒服務短缺，真係每個爸爸媽媽都知道，立法會議員容海恩（Eunice）都飽受輪候唔到託兒服務之苦。Eunice尋日喺立法會發言時自爆，佢懷孕五個月開始輪候託兒服務，輪候到個BB就快三個月大，都仲未排到託兒所服務。
Eunice話，雖然屋企有工人姐姐，但最多只能睇住個小朋友，難以要求佢教導小朋友，佢就特別買咗支學習筆，點點下就可以講唔同語言，所以佢需要輪候託兒服務，但成個銅鑼灣只有一間託兒中心，至今都未話到畀佢聽到底幾時先有位，咁難搵託兒所，真係好難釋放女性勞動力。
「責任唔應該轉嫁祖父母」
之前政府鼓勵祖父母幫手湊孫，Eunice就批評，呢個唔應該係祖父母嘅責任，「湊完我哋仲唔夠，仲要同你哋湊埋下一代呀？」呢啲係父母嘅責任，唔應該轉嫁，但依家社會環境逼到好多人要做雙職父母，政府真係應該擺多啲資源去搞好託兒服務。