政情：為氹長者開心 林青自學摺毛巾復活兔

Erica話，安老院嘅長者好多都冇子女去探訪，又成日唔講嘢，長期落嚟就愈來愈封閉，所以佢特別鍾意探訪安老院，撩老人家傾偈。不過探訪都要諗啲活動畀長者做，所以佢就臨急抱佛腳，上網自學摺復活兔同埋玫瑰花，去到現場教長者整，臨走時長者仲掉番轉頭送復活兔畀佢哋添，真係窩心。

老公即場示範自創長者運動

Erica老公唐卓敏醫生都有去，仲即場示範一套佢自創嘅、啱長者做嘅五分鐘運動。咦？唐醫生係核子專家，點會識呢啲呢？Erica笑稱，因為佢落咗柯打畀老公，要諗一套坐喺輪椅上都做到、簡單易記、又可以促進全身血液循環嘅運動，結果老公真係諗到一套由腳指尾郁到上頭頂嘅椅上操出嚟，就連即場跟住做嘅看護都做到出汗添。