政情：陳振彬趕絕細菌 去廁所洗兩次手
好多香港人都熱愛旅行，成日周圍飛，不過近日爆發麻疹，機場更加係重災區，搞到唔少人出入都好擔心。但觀塘區議會主席陳振彬就唔係咁諗，佢話自從二○○三年沙士一疫後，香港人嘅衞生防護意識提升咗好多，有病要戴口罩已經係常識。今次爆發麻疹，好多唔同團體、組織都有發出相關資訊，提醒市民應該點做，相信要出入機場嘅市民都會分外留神。講起注重衞生，陳仲話佢自己去洗手間會洗兩次手添。
摸鼻眼應盡量避免
陳話，好多人去完洗手間都會洗手，不過洗手間入面最多菌，所以應該喺觸摸洗手間入面嘅物件後就先洗手消毒一次，去完洗手間後就再洗，咁就有雙重保障，更加安全衞生喇。而陳都仲有另一個「小貼士」畀市民，佢話好多人都有一個小動作，就係不自覺地摸自己個鼻或眼，認為呢啲小動作值得留意，要盡量避免，特別係去到病菌較多嘅地方，就更加要注意，唔好咁做喇。咁注重衞生，唔怪得佢話自己最近出入機場六次都冇有怕喇。